ထို့ပြင်
မိဘဝတ္တရားတွေထဲမှာ “မကောင်းမြစ်တား၊ ကောင်းရာညွှန်လတ်၊
အတတ်သင်စေ” ဟူသော ဝတ္တရားသုံးခုသည် အခြေခံအဓိကကျသကဲ့သို့ လင့်ဝတ္တရားတွေထဲမှာလည်း
“မထေမဲ့ကင်း၊ မိစ္ဆာမမှား၊ မြတ်နိုးကြင်”
ဟူသည့် ဝတ္တရားသုံးက ပိုမိုအဓိကကျပေလိမ့်မည်ဟု ထင်ပါသည်။ လင့်ကျင့်ဝတ်ငါးပါး ရှိပေသည်။
“မထေမဲ့ကင်း၊ အပ်နှင်းဥစ္စာ၊ မိစ္ဆာမမှား၊ ဝတ်စားဆင်ယင်၊
မြတ်နိုးကြင်၊ ငါးအင် လင်ကျင့်ရာ”(သိင်္ဂါလောဝါဒသုတ်မှ သင်္ဂဇာဆရာတော်ကဗျာ)။ အခြေခံ
လူ့ကျင့်ဝတ်တို့ကို အလေးမထားဘဲ မနေသင့်ပေ။ အခြေခံကျသည့် လင့်ဝတ္တရားသုံးခု မကျေပွန်ပါဘဲ
ကျန်သည့် ဝတ္တရားများ ဘယ်လောက်ပဲ ကျေပွန်သည်ဆိုဆို ရေသောက်မြစ်မပါဘဲ ရှင်သန်နေရသည့်
သစ်ပင်လို ဘယ်သောအခါမှ ဘဝလှလှပပ၊ အ်ိမ်ထောင်တစ်ခု တည်တည်ငြိမ်ငြိမ် လှလှပပ တည်ဆောက်လို့
ရမည် မဟုတ်ပေ။ မိမိတို့ကိုယ်တိုင်ကလည်း ယနေ့ သားသမီးတွေရနေကြပြီဆိုတော့မိဘစိတ်အပြည့်အဝရှိဖို့၊
မြင့်မိုရ်ဦးပိုင်ရှင် ပီသဖို့ အထူးလိုအပ်ပါမည်။
အိမ်ဦးနတ်ဟူသော ဖခင်တစ်ဦးသည် သားသမီးတို့အတွက်သာ
မြင့်မိုရ်ဦးဖြစ်သည်မဟုတ်သေး၊ မိမိ၏အိမ်ရှင်မ ဇနီးအတွက်လည်း မှီခိုအားထားရာ “ရွှေတောင်ကြီး” သဖွယ် လင်ကောင်းမယားတိုင်းက
အလေးထား မှတ်ယူကြမည်မလွဲပေ။ မိမိဇနီးမယား၏ ရွှေတောင်ကြီးဖြစ်ဖို့အတွက် “အပ်နှင်းဥစ္စာ၊ ဝတ်စားဆင်ယင်” လောက်တင် ပြည့်စုံမည်
မဟုတ်ပါပေ။ အရေးကြီးဆုံးကတော့ “မထေမဲ့ကင်း၊
မိစ္ဆာမမှား၊ မြတ်နိုးကြင်” ဟူသည့် လင့်ဝတ္တရား သုံးပါးက ပိုမို အဓိကကြမည်ဟု ထင်မြင်မိပါသည်။ “လူဆိုတာ
ငွေရှာနိုင်ရင် ပြီးတာဘဲ၊ ငွေရှိရင် အရာရာပြည့်စုံတာဘဲ” ဟု အများစုထင်မှတ်နေကြသည်ကို
စာရေးသူ မကြာခနလိုလို ဖတ်ဖူး မှတ်သားဖူးသည်။
ထိုစကားသည် လက်တွေ့ မိသားစုဘဝတွင် ငွေရှာနိုင်ရုံ၊ ငွေရှိရုံမျှဖြင့် အိမ်ထောင်မှု
သာယာလိမ့်မည်ဟု မထင်ပါ။
တစ်ခါက
အိမ်ဦးနတ်ခေါ်သည့် ဖခင်တစ်ယောက် ပြောဖူးသည်။ “သူဟာ အိမ်ဦးနတ်ပီသကြောင်း၊ သူ့မိသားစုကိုလည်း
တိုက်နဲ့ကားနဲ့ အိမ်တစ်ဆောင် မီးတပြောင် တူတူတန်တန် ထားနိုင်ကြောင်း၊ သူ့သားသမီးတွေကိုလည်း
အဆင့်မြင့် ပညာရေးစာသင်ကျောင်းတွေ၊ ကျူးရှင်တွေ၊ တက္ကသိုလ်တွေမှာ ထားနိုင်ကြောင်း၊ သူ့အိမ်ရှင်မက
ဒီလို နေ့မအား ညမအား ငွေရှာပေးနိုင်တာတောင် သူ့အပေါ် သဘောထားသေးသိမ်ကြောင်း၊ ဒီလောက်ငွေရှာပေးနိုင်တာတောင်
အမြင်မကြည်ဘဲ ပူညံပူညံလုပ်ချင်သေးကြောင်း၊ မိမိမိသားစု ဆိုးကြောင်း၊ သူသာ ကောင်းကြောင်း”
များကို သေရည်ကလေး ခပ်တွေတွေဖြင့် ရင်ဖွင့်သလိုလို ကြွားသလိုလို ပြောနေပါသတဲ့။
စဉ်းစားကြည့်ပါ။
မိသားစုအပေါ်မှာ သူ့အယူဆ၊ သူ့ခံယူချက်တွေ သူ့ကိုယ်သူ မှန်သည်ဟု ပြောနေသော်လည်း လက်တွေ့ဘဝတွင်
နားထောင်သူတွေ၊ ပတ်ဝန်းကျင်ကသူတွေကတော့ ”ငွေရှိမှ
အရာရာပြည့်စုံတယ်” ဟူသည့်အယူအဆကို အပြည့်အဝ လက်ခံကြလိမ့်မည် မဟုတ်ပေ။ အိမ်ထောင်ဦးနတ်ခေါ်သည့်
ဖခင်သည် အိမ်ရှင်မ၏ မှီရာအားကိုးရာ ရွှေတောင်ကြီးဖြစ်ဖို့အတွက် တနည်းဆိုရသော် လင်ကောင်း
အိမ်ဦးနတ်ကောင်း ပီသဖို့အတွက် လင့်ဝတ္တရားတွေထဲမှာ “အပ်နှင်းဥစ္စာ၊ ဝတ်စားဆင်ယင်” ဆိုတာလေးနှင့် ပြည့်စုံလုံလောက်မည် မဟုတ်ပါ။
အရေးကြီးဆုံးက “မထေမဲ့ကင်း၊ မိစ္ဆာမမှား၊ မြတ်နိုးကြင်”
ဟူသော ဝတ္တရားသုံးပါးက ပိုပြီး အဓိကကျသည်ဟု ဆိုရခြင်းဖြစ်ပါသည်။ “လင်ကောင်းအိမ်ရှင်၊ တရွှင်ရွှင်၊ လင်ဆိုးမယား တဖားဖား”
ဆိုသကဲ့သို့ အထူးသဖြင့် အိမ်ဦးနတ်က ခေါင်မိုးမိုးမလုံပါလျှင် အိမ်ထောင်ရေး သာယာစိုပြေဖို့
ခဲယဉ်းပါလိမ့်မည်။ လင်ကောင်းလျှင် အိမ်ထောင်ရေး သာယာစိုပြေမည်။ လင်ဆိုးလျှင် မယားနှင့်
သမီးသားများ တဖားဖား ဒုက္ခရောက်ရတတ်သည်။ ထို့အတူ အိမ်ရှင်မသည်လည်း မိမိအမျိုးသားအပေါ်
မယားဝတ္တရား ကျေပွန်စွာ အပြန်အလှန် အညမည သဘောတရားများ ဖြည့်ဆည်းရမည်။
မေတ္တာဖြင့်
ဒေါက်တာသုတာစာရာလင်္ကာရ
မေ့သားလှ(ဇလဂ္ဂ)
No comments:
Post a Comment