.. လွမ်းလှပါသည်…သုံးဌာနီ…
၁။ မမဝေကိုလွမ်းတယ်..
ဘဝမှာလူရယ်လို့ဖြစ်လာပြီဆိုကတည်းကလွမ်းစရာတွေရင်နှင့်အမျှရှိခဲ့ကြမှာပါ။ လူသားတွေထဲကလူသားတစ်
ယောက်ဖြစ်နေတဲ့ဘုရားသားတော်ရဟန်းတစ်ပါးဖြစ်တဲ့မိမိမှာလည်းအမှတ်ရစရာတွေအများထဲမှဘဝမှာဘယ်လိုမှမေ့မရနိုင်တဲ့လွမ်းစရာတွေဖြစ်ပေါ်လာပုံကတော့…….
မင်းမြန်မာပြည်ကိုတခေါက်ပြန်ရအုံးမယ်..ပညာသင်ဖို့ထွက်လာပြီဆိုကတည်းက(၃)နှစ်ပြည့်မှပြည်တော်ပြန်မယ်လို့ဆုံးဖြတ်ထားပြီးသား။ပညာသင်စရိတ်လှူဒါန်းခဲ့သူအားလုံးကိုလည်းမိမိရည်မှန်းချက်အားလုံးကိုလည်း
ပြောပြထားပြီးပြီ။ခုတော့ရောက်တာမှတစ်လမပြည့်သေးမြန်မာပြည်ပြန်ရအုံးမယ်ဆိုတော့ စိတ်ဓာတ်ကျနေမိပြီ။ မပြန်ချင်သေးဘူး။ ရောက်တာမှမကြာသေးပြန်ရမယ်။ အားလုံးကိုဘယ်လိုမျက်နှာပြရမလဲ။မပြန်မဖြစ်ပြန်ရမယ်ဆိုတော့ဘယ်သူ့အကူအညီတောင်းရမလဲ။ပြည်တော်ပြန်ဖို့အရေး ပြန်လာပြီးပညာသင်ယူ ရေး သူငယ်ချင်းအားလုံးတိုင်ပင်လိုက်တော့….တွေ့ပြီမင်းမပူနဲ့တော့တဲ့။ဒို့ကျောင်းသားများရဲ.အားကိုရာမမဝေ
ဆိုတဲ့ကျောင်းသားအဖွဲ့အစည်းရှိတယ်ဆိုတော့နည်းနည်းဝမ်းသာမိတယ်။
ဒါပေမဲ့မရောက်ဖူးသေးတော့သိပ်ပြီးတော့ဝမ်းမသာနိုင်သေး။အားကိုးလို့ရနိုင်ပါ့မလား။သံသယတွေနဲ့ပေါ့။
ရောက်ပါပြီ။မမဝေရဲ့အရိပ်ဆီသို့။တကယ်ပဲအေးမြခဲ့ပါတယ်။အပူကလာတဲ့သူကိုရေအေးအေးတိုက်သလို
မိခင်ပျောက်နေတဲ့သားသူငယ်မိခင်ကိုပြန်တွေ့လိုက်ရသလို တာဝန်ရှိသူတွေကအားပေးကူညီခဲ့ကြတယ်။
မမဝေရဲ.ကျေးဇူးတွေကြောင့်မိမိရဲ.ပညာရေးလမ်းကြောင်းဟာချောမွေ့ခဲ့တယ်။
ယနေ့အချိန်ထိဆယ်စုနှစ်ကျော်တာဝန်အဆက်ဆက်ယူခဲ့ကြတဲ့ဆရာတော်တွေရ.ဲဂုဏ်ကျေးဇူး(သို့)မမဝေ
ကျောင်းသားစုကြီးရဲ့အရိပ်ဟာဘယ်လောက်အေးမြနေလဲဆိုတာမမဝေရဲ့အရိပ်အောက်မှာခိုလှူံခဲ့ဖူးသူအားလုံး
သိနေမှာပါ။ဒါကြောင့်မမဝေကိုလွမ်းတယ်။
ဆက်လက်ပြီးတော့နောင်လာမဲ့ညီတော်နောင်တော်တွေကိုလည်းလွမ်းခွင့်ပြုပါအုံး။ ကျွန်ုပ်ကတော့ ထာဝရလွမ်းနေမှာပါ….မမဝေ…….။
၂။ အမေနဲ့မြန်မာပြည်ကိုလွမ်းတယ်။
ကဲတက္ကသိုလ်ကျောင်းသားကြီးဖြစ်ပြီဆိုတော့ ကိုယ့်လူဆွမ်းနဲ့ဆွမ်းဟင်းချက်ပေတော့။မင်းအိန္ဒိယရောက်ရင်ထမင်းအရင်ချက်တတ်အောင်သင်ရမယ်တဲ့။ဒုက္ခပါလား။ဆွမ်းချက်ရမယ်ဆိုတော့ကျန်တဲ့တိုလီမုစ္စတွေဝယ်ရအုံးမှာပေါ့။တတ်နိုင်ဘူးး။ရောမရောက်ရင် ရောမလို ကျင့်ရမယ်တဲ့။ထားတော့….။
အကောင်းဆုံးဖြစ်အောင်ဟင်းချက်နည်းတစ်ရာစာအုပ်ကြည့်ပြီးချက်ပေမဲ့ဘယ်လိုမှအစဉ်မပြေခဲ့..။ စာအုပ်ကပဲမှားနေတာလား။အချိုချက်ရင်အချဉ်ဖြစ်။အချဉ်ဆိုအငန်….ဒီကြားထဲသူငယ်ချင်းတွေက ဆွမ်းစားဝိုင်းမှာအပေါ့အငန်ရွေးကြသေး.။ကဲကိုယ့်လူတို့ရေပေါ့ရင်ဆားထည့်…ငန်ရင်ရေထည့်ပြီးစားကြပေတော့။ မစားချင်ရင်လည်းနေကြစိတ်ပေါက်ပေါက်နဲ့ပြောပြီးဆွမ်းစားဝိုင်းမှထခဲ့တဲ့အကြိမ်ပေါင်းလည်းမနည်းတော့။
ပြောပြီးတော့လည်းစိတ်မကောင်းဖြစ်မိတယ်။အမေ့ကိုအပြစ်တင်မိတယ်။ဘာကြောင့်များဘုန်းကြီးဝတ်မဲ့သားကိုဟင်းချက်တတ်အောင်သင်မပေးခဲ့တာပါလိမ့်အမေ..။
အမေ့ကိုလွမ်းတယ်..အဖေအမေနဲ့တူတဲ့အမိမြန်မာပြည်ကိုလွမ်းတယ်…သတိရတယ်..နိုင်ငံခြားရောက်မှ
ကိစ္စများမြောင်လူတို့ဘောင်ဆိုတဲ့…ဆိုရိုးစကားကိုသဘောပေါက်တော့တယ်…ကျန်တာတွေအပထားဟင်းတခွက်ဖြစ်မြောက်အောင်ချက်ရတဲ့ဒုက္ခနဲ့တင်အမိမြန်မာပြည်နေတုန်းကမြန်မာပြည်ရဲ.ဂုဏ်ကျေးဇူးးကိုမသိခဲ့ဘဲပြည်ပရောက်မှအမိမြန်မာပြည်သူပြည်သားတွေရဲ.ကျေးဇူးတရားတွေကိုသတိရနေမိတယ်။မိမိတို့လိုရဟန်းတော်တွေကိုအစစအရာရာထောက်ပံ့လှူဒါန်းနေတဲ့အမိမြန်မာပြည်သူပြည်သားတွေရဲ.လိုအင်ဆန္ဒတွေပြည့်ဝပြီး
ဆက်လက်ပြီးအမျိုးဘာသာသာသနာကိုဆောက်ရှောက်နိုင်ကြပါစေလို့လည်းဆုတောင်းရင်း
လွမ်းနေမိတယ်အမေ..
အမိမြန်မာပြည်ကိုသားတို့လိုမြန်မာရဟန်းတော်တွေလွမ်းတာမထူးခြားပေမဲ့မြန်မာပြည်ကိုရောက်ဖူးတဲ့တိုင်းတ
ပါးလူမျိုးခြားဗုဒ္ဓဘာသာဝင်တွေကလည်းလွမ်းကြတယ်အမေ။သားတို့တက္ကသိုလ်ကျောင်းပိတ်ရက်ရောက်
တော့နီပေါနိုင်ငံရဲ.မြိုတော်ခတ္တမန္ဒူမြို.ကိုအလည်ရောက်ခဲ့တယ်အမေ။အဲဒီမှာမြန်မာပြည်မှာနေခဲ့ဘူးပြီးခုနီပေါမှာဝိပဿနာရိပ်သာတည်ထောင်ပြီးသာသနာပြုနေတဲ့သီလရှင်ဆရာလေးတွေကမြန်မာကျောင်းသားရဟန်းတော်
တွေကိုမြင်တော့အရမ်းဝမ်းသာပြီးနီပေါနိုင်ငံရဲ.တန်ခိုးကြီးဘုရားတွေကိုသင်တန်းတွေမအားတဲ့ကြားကဝမ်းသာအားရလိုက်ပို့ကြတယ်အမေ။နောက်ပြီးတော့သူတို့တတွေကမြန်မာပြည်ကိုလွမ်းတယ်တဲ့.။မြန်မာပြည်ရဲ.ကျေးဇူးတရားတွေသူတို့အပေါ်မှာအများကြီးတင်နေတယ်တဲ့။နောက်ပြီးကာလကတ္တားမှာနေတဲ့ပရော်ဖက်ဆာ
ဒေါက်တာမကြီးတစ်ယောက်ကငါမြန်မာပြည်ကို(၃)ခေါက်ရောက်ဖူးတယ်တဲ့။။မြန်မာလူမျိုးတွေဟာချစ်စရာ
ကောင်းကြတယ်။နောင်လည်းအလည်သွားအုံးမယ်။မင်းတို့နေချင်ရင်နေပြည်တော်မှာကျောင်းဆောက်လှူမယ်တဲ့။ဘယ်လောက်များအံ့သြစရာကောင်းလိုက်လဲအမေ။ ဒါဟာဗုဒ္ဓဘုရားရှင်ရဲ.အဆုံးအမအောက်မှာနေ
ကြတဲ့အမိမြန်မာပြည်သူပြည်သားတွေကိုနိုင်ငံခြားတိုင်ပြည်လူမျိုးတွေကချစ်ခင်နေကြတာဟာဗုဒ္ဓသာသနာ
မြန်မာပြည်တည်တံ့နေလိုပေါ့အမေ…။
သားတို့လိုနိုင်ငံခြားမှာပညာသင်နေရတဲ့ရဟန်းတော်တွေလည်းပြည်ပမှာမပျော်ကြပါဘူးအမေ။ဒါပေမဲ့
ဗုဒ္ဓသာသနာကမ္ဘာအနှံ့ပြန့်စေဖို့ အမိမြန်မာသာသနာတိုးတက်ပြန့်ပွားစေဖို့ဆိုတဲ့ရည်ရွယ်ချက်တွေနဲ့အတူ
အလွမ်းတွေကိုဖြေသိမ့်ပြီးမျိုသိပ်နေရတာပါအမေ.....။
ဗုဒ္ဓရဲ.အလင်းရောင်အောက်မှာတောက်ပနေတဲ့အမေနဲ့မြန်မာပြည်ကိုဆက်လက်ပြီးလွမ်းနေစဲပါအမေ..။
၃။ နာဂပူကိုလွမ်းတယ်…….
သိဒ္ဓတ္ထမင်းသားက ကပိလဝတ်ပြည်နဲ့ကောလိယပြည်တို့အကြားအရင်ဘုရင်အဆက်ဆက်မဖြေရှင်းနိုင်တဲ့
လယ်သမားတွေလယ်ရေလုတဲ့ပြဿနာကိုဖြေရှင်းနိုင်အောင်တောထွက်ပြီးတရားကျင့်တာလို့သူတို့တွေကထင်
နေကြတယ။်ဦးဇင်းတို့ရေ..ဒါကတော့နာဂပူမြို့စွန်လေးမှာကျောင်းတည်ထောင်ပြီးသာသနာပြုနေတဲ့ဆရာတော်
ရဲ.ပြောပြချက်တွေပါ။အိန္ဒိယနိုင်ငံရဲ.ဇာတ်ခွဲခြားတဲ့စနစ်ကိုရွံမုန်းပြီးဗုဒ္ဓဘာသာကိုလူ(၆)သိန်းကျော်လောက်နဲ့
ကူးပြောင်းအောင်ဦးဆောင်ခဲ့တဲ့အိန္ဒိယနိုင်ငံရဲ.ဖွဲ့စည်းပုံဥပဒေကိုရေးဆွဲခဲ့တဲ့တရားရေးရာဝန်ကြီးဒေါက်တာ
အမ္ဗေဒကာရဲ.ကျေးဇူးတွေကြောင့်ဗုဒ္ဓဘာသာဖြစ်လာခဲ့ပေမဲ့အခြေခံကျတဲ့ကံကံရဲ.အကျိုးတရားကိုတောင်
ယုံရမှန်းရှိမှန်းမသိကြတဲ့အတွက်တကယ်သနားစရာကောင်းတဲ့လူတွေပဲလို့ထင်နေမိတယ်။
ဗုဒ္ဓဟောကြားတဲ့တရားဓမ္မတွေကိုသူတို့တတွေကိုဟောကြားချင်ပေမဲ့ဘာသာစကားအခက်အခဲကြောင့်
ပြောပြခွင့်မရခဲ့ပါဘူး။သဒ္ဓမဿဝနံအတိဒုလ္လဘံ-ဆိုတဲ့တရားဟာအလွန်မှန်ပါလားလို့အောက်မေ့နေမိတယ်။
မိမိတို့တတွေကုသိနာရုံဆရာတော်ကြီးနဲ့အတူရပ်ကွက်ထဲဆွမ်းစားကြွတော့ ပန်းကုန်းတွေ
စွပ်ပြီးကြိုဆိုကြတယ်။သူတို့တတွေဟာဗုဒ္ဓဘာသာဝင်ဖြစ်ပေမဲ့ယနေ့လိုအပါး(၂၀)လောက်ရှိတဲ့ရဟန်းတော်တွေကိုတခါမှမမြင်ဘူးကြဘူးတဲ့။နာဂပူနေခဲ့တဲ့(၃)ရက်အတွင်းသတ်သတ်လွတ်ဆွမ်းတွေအားပါးတရကပ်ကြတယ်။
ဆွမ်ကပ်မဲ့သူတွေများနေတဲ့အတွက်အာရုံဆွမ်းကို(၃)ကွမ်းစားခဲ့ရတယ်။
ကုလားလူမျိုးတွေချက်တဲ့ဆွမ်းထမင်းကိုမကြိုက်ပေမဲ့သူတို့စေတနာကိုငဲ့ကွက်ပြီးအားရပါးရဘုဉ်းပေးခဲ့မိတယ်။
သူတို့တတွေသတ်သတ်လွတ်စားပေမဲ့ရဟန်းတွေအတွက်သူတို့မစားပေမဲ့ကြက်ဥတွေပြုတ်ပြီးကပ်ကြတယ်။
သူတို့တတွေရဲ.စေတနာတွေဟာမြန်မာပြည်ရဲ.ဗုဒ္ဓဘာသာဝင်တွေနဲ့ထပ်တူပါပဲလားမိမိကိုယ်တိုင်မြန်မာပြည်
ကိုပြန်ရောက်သလိုခံစားနေမိတယ်။အိန္ဒိယကိုရောက်ကတည်းကကုလားလူမျိုးတွေလှူတဲ့ပိုက်ဆံကတရာ
ကျော်အောင်မရခဲ့ဘူးပေမဲ့နာဂပူမှာတော့ရူပီး(၁၅၀၀)လောက်လှူကြတယ်။
ကုသိနာရုံဆရာတော်ရဲ.ညတရားပွဲမှာရဟန်းတွေကိုပန်းကုံးတွေစွပ်ပြီးကြိုဆိုကြတယ်။တရားပွဲမစခင်
အစီအစဉ်ကြေငြာသူကဆရာတော်ရဲ.ဂုဏ်ပုဒ်ကိုပြောကြားရာမှာအဂ္ဂမဟာပဏ္ဍိတကိုခေါ်ဆိုရာမှာဗျ ဂ္ဃမဟာ
ပဏ္ဍိတလို့ပြောသံကြားတော့ရဟန်းတွေရီစရာဖြစ်နေမိတယ်။တရားပွဲပြီးတော့ရဟန်းတွေအားလုံးကိုသစ်သီး
တွေတပန်းကန်စီကပ်ကြတယ်။အော်...သဒ္ဓါတရားတာရှိပြီှးရဟန်းသံဃာနဲ့ပါတ်သက်ပြီးဘာမှမသိနားမလည်
ကြပါလားလို့အောက်မေ့နေမိတယ်။သူတို့တတွေနဲ့စာရင်အမိမြန်မာပြည်ကဗုဒ္ဓဘာသာဝင်တွေတော်တော်ကံ
ကောင်းကြပါလားလို့တွေးနေတုန်း။ဆရာတော်ရဲ.တရားအဆုံးမှာသူတို့ရွတ်ဆိုတဲ့.....
သဗ္ဗပါပဿ အကရဏံ၊ကုသလဿုပ သမ္ပဒါ။
သစိတ္တပရိယောဒပနံ၊ဧတံ ဗုဒ္ဓါနသာသနံ။
ဆိုတဲ့ဘုရားဟောသြဝါဒပါတိမောက်ဂါထာကိုရွတ်ဆိုနေတာကိုအံသြဝမ်းသာမှင်သက်နေတုန်းမှာ..
အရှင်ဘုရားတို့ရေဒီနယ်ကဗုဒ္ဓဘာသာလူတွေကဒီဘုရားဟောဂါထာကိုလူတိုင်းရကြပြီးသူတို့တတွေရဲ.ရင်ထဲမှာ
မကောင်းတာတွေမလုပ်ကြနဲ့၊ကောင်းမူ့တွေနဲ့ပြည့်စုံအောင်လုပ်ကြ၊မိမိတို့ရဲ.စိတ်ကိုဖြူစင်အောင်ထားကြဆိုတဲ့
မြတ်ဗုဒ္ဓဟောကြားတဲ့ဒီဂါထာရဲ.အဓိပ္ပာယ်ကိုတော့နားလည်းပြီးလက်ခံကျင့်သုံးကြတယ်တဲ့အတွက်တပည့်တော်
အနေဖြင့်ဒီနယ်မှာကျောင်းထိုင်ပြီးသာသနာပြုနေရတာအင်မတန်ဝမ်းသာကြည်နူးရပါတယ်လို့ပြောသံကြား
တော့နိုင်ငံရပ်ခြားမှာအဆင်းရဲခံပြီးသာသနာပြုနေတဲ့ဆရာတော်ကိုကြည်ညိုနေမိတယ်။မိမိတို့သာသနာပြုလို့
ခေါ်ဆိုနေတဲ့မိမိကိုယ်တိုင်ကောတကယ်သာသနာလိုအပ်နေတဲ့အရပ်တွေမှာဒီလိုအဆင်းရဲခံပြီးနေနိုင်ပမလား
လို့စဉ်းစားနေမိတယ်။
နာဂပူမြို.လေးကပြန်ခါနီးမှာတော့သူတို့တတွေရဲ.လက်ပြနုတ်ဆက်မူတွေနဲ့အတူမိမိရဲ.မျက်ဝန်းမှာအမိမြေ
ကခွဲခွါစဉ်ကဝဲနေခဲ့တဲ့မျက်ရည်စတွေနဲ့အတူပြန်ခဲ့ရပေမဲ့မိမိရဲ.နားထဲမှာတော့...မကောင်းမူ့ရှောင်၊
ကောင်းမူ့ဆောင်၊ဖြူအောင်စိတ်ကိုထား။ဆိုတဲ့ အဓိပ္ပါယ်တူ သဗ္ဗပါပဿ အကရဏံ အစရှိတဲ့ သူတို့တတွေရဲ.ညီညီညာညာရွတ်ဆိုသံ ပါဠိအသံလေးတွေကို ကြားယောင်ရင်း
အနာဂါတ်နာဂပူမြို.ရဲ.ဗုဒ္ဓသာသနာဟာသာသနာပြုနေတဲ့ဆရာတော်ရဲ.ကြိုးစားအားထုတ်မူ့တွေနဲ့အတူတောက်ပနေမှာပါလားလို့တွေးတောရင်း…ရင်မှာအလွမ်းတွေနဲ့ပြန်ခဲ့ရပါပြီ…
ရက်လတွေကြာညောင်းခဲ့ပေမဲ့…မမဝေကိုအမှတ်ရတယ်၊နာဂပူကိုသတိရတယ်၊အမိမြန်မာပြည်ကိုလွမ်းတယ်..
အော်..မိမိဘဝမှာတော့ လွမ်းရတဲ့ ဌာနီ သုံးဌာနီ…ရှိနေပါလားလို့တွေးတောရင်းဖြင့်……………
(အရှင်နတ်မောက်)
နာလန္ဒာတက္ကသိုလ်
No comments:
Post a Comment